Home Wararka Maanta Xildhibaan Fiqi: Ma noqon karo Garoonka mid la mid Isbaarooyinkii dalka ka...

Xildhibaan Fiqi: Ma noqon karo Garoonka mid la mid Isbaarooyinkii dalka ka jiray

Xildhibaan Axmed Macalin Fiqi oo ka tirsan Golaha Shacabka Somaliya ayaa si kulul uga hadlay is hor istaagii lagu sameeyay Wafdigii Madasha Xisbiyada Qaran ee ku sii jeeday Magaalada Baledweyne ee Gobolka Hiiraan.

Fiqi ayaa sheegay arrin laga xumaado inay tahay in hakad la galiyo madax gurmad u sameynaysa shacabka reer Baledweyne oo ay saameysay fatahaadii ka dhalatay Wabiga Shabelle.

“Waa wax laga xumaado in hakad la geliyo socdaal ay saakay ku tagi lahaayeen madaxda madasha xisbiyada qaran magaalada Baledweyne ayagoo ujeedkoodu ahaa gurmad u fidinta dadka Soomaaliyeed ee fatahaadda webigu ay saamaysay.” Ayuu yiri Xildhibaan Fiqi

Isaga oo hadalka sii wata ayaa Xildhibaan Fiqi wuxuu tilmaamay inaysan jirin sabab is hor taag loogu sameeyo gargaar loo wado dad dhibaateysan.

“Sabab gargaar loo wado Beledweyne isbaaro loogu dhigto ma jiri karto, laakin waxay muujinaysaa niyad xumada kooxda Villa Somalia iyo halka uu gaarey falfal-xumadoodu.”

Ugu dambeyn Xildhibaan Axmed Macalin Fiqi ayaa sheegay Garoonka Aadan Cadde inuusan noqon karin mid la mid ah Isbaarooyinkii dalka ka jiri jiray.

“Garoonka Muqdisho ma noqon karo mid la mid ah isbaarooyinkii dalka ka jiri jiray, cid laga yeelayana ma jirto wax aan sharciga waafqsanayn, Baledweyne waa tagis si kastoo turaanturooyin loogu horgudbo.”

SHARE